هوسبريس
على غرار كثير من الفنانين المغاربة الذين أغضبتهم طريقة وزارة الثقافة في توزيع الدعم الاستثنائي على الفنانين، خرج فنانو مدينة تمارة، ببيان غاضب، عبروا فيه بطريقتهم على عدم اتفاقهم مع المقاربة التي اعتمدتها وزارة الثقافة في التعاطي مع موضوع الدعم، وفي ما يلي نص البيان المصاغ بالدارجة:
“الو … وزارة الثقافة … دوز لينا المسؤول على اللائحة ديال الدعم الاسترزاقي ولا الاستتنائي …
سمع مزيان او حل ودنيك، راك عرفتي مزيان كيفاش تورط المسؤول عن القطاع .. الراجل راه دخل بحسن نية كيف ما جا فالتصريح ديالو حول الدعم الاستتنائي لفائدة الفنانين اللي مهنتهم الوحيدة هي الفن . ولكن انت خليتي ملف الدعم فيه خروقات و حزوقات قانونية و اجتماعية و سياسية و فنية و اقتصادية و انسانية او زيد او و زيد او زيد ..
الو … نعام ؟ كتسول علاش ؟
حنا اللي كنسولو علاش ؟ واش اعباد الله، عرام ديال الموظفين مع الدولة أو كيستافدو من الميزانية العامة، اش كيديرو عندك فديك اللائحة ؟ ماشي من حقك تعطيهم المال العام ديالنا او هما كيتخلصو شهريا من الدولة.. ياكما هاد لفلوس بريمات ديال صفة الشبح اللي كيمتلوها عليكم وعلينا .. المهم اسمع .. راه غادي نرفعو دعوة قضائية ضدهم او ضدكم ديال اهدار المال العام و تشجيع التهرب الوضيفي .. وا جاوب ؟
علاش كتخرج العزو من فلوس الدعم ؟
ايه الله ايرحمو كان فنان كبير ولكن راه مات … و المشروع كيموت مع مولاه..يعني ملغي .. بغيتي تعزيه عطيه من راس مالك .. الحيين اولى من الميتين الله يرحمهم … كيفاش ؟ كتسول على اللي خدامين معاه واش ماشي من حقهم ؟ واش دابا سؤال هدا ؟ منين كتفهم ؟ راه القانون واضح فهاد النقطة خاصك تراجعو باش تفهم ، ولا المحامين ديالنا غادي يجيو ايفسروه ليك مع الاندار … فلا يعدر احد بجهله القانون ..
هدا أسيدي راه المال العام و الدولة ماشي جمعية او محسن كتوزع الهبات او الاكراميات بلا موجب شرع…
بغيناك تجاوبنا علاش كتخطب فالمزوجة؟
ما فهمتيش ؟ واسمع … لائحة المشاريع اللي استافدات من الدعم فيها مشاريع تقدمت للوزارة سنوات هادي ..او كاينة اللي سبق و ستافدات من الدعم بعناوين مغايرة او بنفس العناوين او هاهي اليوم كتزيد تستافد .. واش ماشي الطنز العكري هدا ؟ اش غادي تقول فهادشي ؟ الحاصول الدعوة لله هو اللي ياخد الحق من كل ظالم و اي واحد عالم علا هاد المهزلة او ساكت .. ولكن متخممش غادي نخرجو ليك من الجنب او نحاسبوك!!! فالواقع ماشي فالفايسبوك !!!
ادوي ؟ علاش كاتبوس فحناكك ؟
ضروري خاصك تعرف الفنان معرفة شخصية عاد تعطيه الدعم ؟ ولا خاصو يكون صاحبك او صاحبتك ؟ جا الوقت باش نحيدو ثقافة بني عميست او بني خاليست او صاحبيست او جاريست الى آخيست… ثقافة و سلوك المحسوبية و الزبونية ضمرات دول ماشي غير قطاعات وزارية … واحنا عندنا صور ديال جلسات فالقهاوي… او بيران معلومة يقصدها الشاعر و الغاوي .. كتخاد فيها قرارات مصيرية او فيها كيتقدمو الولاءات … اليوم اسي بان الحق او غادي يزهق الباطل .. حنا جايين .. غادي نتحاسبو
علاش كتقول للسفناج غديني ؟…واش كاين شي حد كيتغدى عند السفناجة ؟
خاص الوزير يفهم مزيان ان اللي دايرين بيه او اللي كيشاورهم رباعة ديال السفناجة ميتسناش منهم ايوجدو ليه شي شهيوة صحية و بنينة ترضي الجميع و يقبلها كولشي .. را جهد جهدهم هو يصاوبو ليه شواري ديال الزيروات وسفنجات خاويين … رداءة و حموضة ولقايج متوصلش حتى لمستوى السهرات الفنية فمخيم صيفي .. و الدليل علا كلامنا هو لائحة السفناجة المزلكة اللي علنتو عليها بلا حشمة بلا حيا، فيها مشاريع اللي فعمرها 36 سنة .. او حتى الى كانو فداك الشريط شي كرموسات يستاهلو .. راه غادي يزيتوهم او يعفنوهم لخرين …
علاش كتسول شكون حنا ؟
أسيدي حنا الخبازة اللي كيعرفو حر الفران ديال الفن عموما و المسرح خصوصا .. حنا الكسابة اللي كندفعو البهايم ترعى قدامنا ..حنا طبا متخصصين فتحياد الجلالة على العينين ..
او باش تعرفنا غادي نوقعو على هاد البيان قدام الوزارة بدمنا او لحمنا او تماك غادي تعرف شكون حنا … ايوا تسنانا الى مصححتيش هاد الغلطة لكبيرة فتاريخ الثقافة المغربية او فأقرب الاجال ..ويلا مستدركتيش الخطأ غادي نوقفو بكل المكونات و الشرائح و الاطياف الفنية قدام الوزارة او نسلسلو ريوسنا بالحديد احنا او ولادنا حتى يشوف العالم كيفاش القطاع الوصي علينا كيعاملنا …
ودوز بخير”.
